بانێکە و دوو گوواو¹

زۆرێک لە کورد و جیهان لەسەر یەکەم دەوڵەتی کوردستان دەڵێن:

– ئێستا جیهان پێشکەوتووە. باوی دەوڵەتی نەتەوەیی نەماوە. تەنها مرۆڤ گرنگە، نەتەوە فشەیە. دەبێت مرۆڤایەتی فێر ببێت جیاوازییە نەتەوایەتییەکان پەسەند بکات و هەموو نەتەوەکان پێکەوە لە دەوڵەتێکی جیهانیدا بژین کە مافی مرۆڤ تیایدا سەروەر بێت.

هەمان ئەو کوردانە و ئەو جیهانە لەسەر بیست و سێیەمین دەوڵەتی عەرەبی بۆ فەڵەستین دەڵێن:

– ئێستا پێویستە دەوڵەتی فەڵەستین بونیاد بنێین. چیتر نابێت ستەم لە فەڵەستینییەکان بکرێت. جیهان ستەمکار و بێڕەوشتن کە نایەن بە دەنگ ئازاری منداڵی فەڵەستینییەوە. دەبێت جیهان دەوڵەتی فەڵەستین بۆ عەرەبەکان پەسەند بکات تا دوور لە چەپۆکی ورووژێنراو و بەردتێگیراوی ئیسرائیل بژین. بۆ ئەوەی لەو دەوڵەتەدا مافی عەرەبی فەڵەستینی سەروەر بێت.

ئیتر فەرموون هەڵەکە بە چاوی خۆتان ببینن. کوردەی نەگبەتی بەنجکراو، خەمێکی نەتەوەی خۆت بخۆ، واز لە جیهانبازی و ئازادکردن و پاککردنەوەی جیهان و ئەم شتە قۆڕانە بهێنە. ژووری نووستنەکەی خۆت کۆ بکەوە. بستێک خاک بخە ژێر هەنگاوەکانتەوە، ئینجا خەمی ژووری نووستن و خاکی ژێر هەنگاوی خەڵکی تر بخۆ. کار بۆ نەتەوەی خۆت بکە با سبەی منداڵەکانی نەتەوەکەت ڕێز لە یادت بگرن.

1. لە ٩ی شوباتی ٢٠٢٤دا نووسیومە. ↩︎