بەربوورەی ٦

بەربوورە ناوی ژانرێکی موزیکییە لە ژەندنی خۆم. پێشتر وتارێکی کورتم لە بارەیەوە نووسیوە. دەتوانیت لێرەدا کلیک بکەیت بۆ ئەوەی بیخوێنیتەوە.

وتەیەک لەسەر ئەم بەربوورەیە

ئەم بەربوورەیەم بە ئامێری پیانۆی کارەبایی ژەندووە، دەنگەکەیم کردووە بە پیانۆی گەورە (گراند پیانۆ ٤). ئەم بەربوورەیە یەکێکە لە موزیکە هەرە دڵخوازەکانی خۆم و شایستە بوو ببێت بە نەستژەنی، بەڵام نەمویست بە ناونان سنوورداری بکەم، بۆیە وەک بەربوورە بڵاوم کردەوە.

هەستێکی سەیرم هەیە لەگەڵ تۆمارکردن و بڵاوکردنەوەی ئەم موزیکانەدا (واتە هەم بەربوورە و هەم نەستژەنی): هەندێکیان لە کاتی ژەندنیاندا بە دڵم نین، دوایی گوێیان لێ دەگرمەوە و بە دڵم دەبن. هەندێکیان لە کاتی ژەندنیاندا بە دڵم نین، دوایی گوێیان لێ دەگرمەوە و دیسان بە دڵم نین. هەندێکیان لە کاتی ژەندنیاندا بە دڵمن، دوایی گوێیان لێ دەگرمەوە و هێندە بە دڵم نابن. هەندێکیان لە کاتی ژەندنیاندا بە دڵمن، دوایی گوێیان لێ دەگرمەوە و بە دڵم دەبن. لە کاتی ژەندنی ئەم بەربوورەی شەشەمەدا زۆر چێژم لێی بینی. با ئەمە بۆ یادگار بمێنێتەوە.

واتای بەربوورە

وشەکە بە گوێرەی فەرهەنگی وەهبی و ئەدمۆندز لە دەستەواژەی «لە بەربوورە»دا هەیە بە واتای کارێکی بێ نەخشە و بێ ئامادەکاری دێت. ڕەنگە بەرانبەر ئیمپرۆمپتو impromptuی زاراوەی موزیک بوەستێتەوە. من وەک ناو بۆ ئەم ژانرەم بە کار هێنا و لە ئایندەشدا بەربوورەی ترم دەبێت. بە هیوام چێژیان بۆ بیسەران هەبێت.

موزیکەکە