ئەمڕۆ ویستم نووسینی (چاوپێکەوتن لەگەڵ ئامادەبووی کۆنسێرتێکدا) بڵاوبکەمەوە (کە لە مانگی دووی ئەمساڵدا 2020 لە فەیسبووکە داخراوەکەی خۆم بڵاومکردەوە) بەڵام نەمزانی چ وێنەیەک دابنێم. خۆزگەم خواست وێنەکێشێک وێنەیەکی ئەو باڵەخانە خەیاڵییەی بکێشایە و منیش بمتوانییایە بیکەم بە بەرگی چیرۆک/چاوپێکەوتن/وتارـەکەم. بەڵام وتم خۆ دەتوانم وێنەیەکی قادر دیلان دابنێم. کەچی هەموو ئینتەرنێت گەڕام وێنەیەکی ئەو کەڵەهونەرمەندە بە کوالیتییەکی باش و قەبارەیەکی باش نەبوو؛ کە لە ڕاستیدا دەبوو چەندین تابلۆ و پەیکەر و وێنە و ڕاپۆرت و ژیننامە و پەڕتووکی هەبووایە؛ کەچی… دێڕەکەی گۆرانم بیرکەوتەوە کە لە هۆنراوەکەی (دەروێش عەبدوڵڵا)دا دەفەرمێ:
بەڵێ، دیارە، لەناو قەومی بەسیتا قەدری سنعەتکار
وەکوو عەکسی قەمەر وایە لەناو حەوزێکی لیخندا،
بۆیە من کە بە هیچ شێوەیەک وێنەکێش نیم و هیچی واشی لێنازانم، ئەوەنەبێ لە مناڵیما خولیام بوو؛ هەستام بە کێشانی قەڵەمکێشێک لەسەر وێنەیەکی ماکی خۆی کە بە کوالیتییەکی خراپ لە ئینتەرنێتدا هەیە. بۆیە تا ئەو ڕۆژەی شێوەکارەکانمان هۆشیان بەبەر خۆیاندا دێتەوە و دوو سێ تابلۆی دانسقەی ئەو کەڵەهونەرمەندە دەکێشن و پەیکەرە حەفتا مەترییەکەی بۆ دەکرێ؛ با ئەم قەڵەمکێشەی من هەبێ بۆ کەسێک کە بییەوێ وێنەیەکی قادر دیلان بەکاربهێنێ. بۆیە ئەم وێنەیەم کرد بە موڵکی گشتی و هەرکەسێ لە هەر شوێنێ چۆنی دەوێ بەکاریبهێنێ.
هەر لەم ماڵپەڕەدا وێنەکە بە دوو قەبارە هەیە؛ قەبارەی یەکەمیان کە (DSW) بە ناوەکەیەوەیەتی (کە کورتکراوەی Down-sampled for webـە)، لە مێگابایتێک کەمترە و تەنها بۆ بەکارهێنانی ماڵپەڕ باشە، ئەوی تریان (FQ) بە ناوەکەیەوەیەتی (کە کورتکراوەی Full Qualityیە) ئەوەیان نزیکەی نۆ مێگابایتە و بۆ چاپ شیاوە.
