سینکۆپارتی
وشەی «سینکۆپارتی» لێکدراوی خۆمە. لە «سینکۆپەیشن» و «پارتی» پێک هاتووە. سینکۆپەیشن (syncopation) لە مووسیکدا جۆرە ژەندنێکی ڕەزمە، هەوڵ دەدات لە سەری ترپەکان دوور بکەوێتەوە و ترپەی لاواز بەهێز بکات. پارتی-ش (party) واتە ئاهەنگ. کەواتە سینکۆپارتی واتە: ئاهەنگی لاترپە.
کاک ڕەنج مستەفا ساڵی ٢٠١٧ نیازی وا بوو دەقی دوژمنی گەلێک-ی هێنریک ئیپسن بخاتە سەر سەکۆی شانۆ. کاری منی بۆ شانۆیی مارا/ساد دیبوو و بیستبوو، لە مانگی شوباتی ئەو ساڵەدا داوای کرد مووسیکی ئەم شانۆییە دابنێم. منیش بە دڵ و بە گیان خۆم خستە پڕۆژەکەوە. ئەم مووسیکە (تەواوکراوە) و هەندێکی تەواونەکراوم بۆی دانا.
شوێنی ئەم مووسیکە بە نزیکی دەکەوتە سەرەتای شانۆکەوە (پەردەی یەکەم). لە ماڵی پاڵەوانی شانۆنامەکە (دکتۆر ستۆکمان) کۆبوونەوەیەک هەیە. کاک ڕەنج دەیەویست شێوەیەک لە ئاهەنگ بەم کۆبوونەوەیە بدات. من ئەم مووسیکەم بۆ ئەو دیمەنە دانا.
ماوەیەک پڕۆڤە کرا. بەڵام بە هەر هۆیەک بوو (کە من زۆر لێی ئاگادار نەبووم)، شانۆکە نەکرا و نەخرایە سەر سەکۆی شانۆ. دواتر خۆم ویستم فیلمێک بکەم. نیازم وا بوو ئەم مووسیکەی بۆ بە کار بهێنم. بەڵام پاش زیاتر لە ساڵێک کار، ئەو فیلمەش نەکرا.
لە ١٨ تا ٢٧ی شوباتی ٢٠١٧ ئەم مووسیکەم بۆ پیانۆ دانا. پاشان دابەشم کرد بەسەر تیپێکی ئۆرکێسترادا. بەڵام دابەشکاریی ئۆرکێستراکەم بە دڵ نەبوو، چونکە هەندێک کێشەی تێدا هەن کە دەبوو چاکیان بکەم. دەشمەویست هەندێک شوێنی بگۆڕم، بە تایبەتی ناوەڕاستەکەی و تۆزێک لە کۆتاییەکەی. بەڵام هەر فریا نەکەوتم ئەو دەستکارییانە بکەم. لە حەفتەی یەکەمی ساڵی ٢٠١٨دا جارێکی تر بە سکۆری پیانۆکەدا (نەک هی تیپەکەدا) چوومەوە و سکۆرێکی پاکنووسی پیانۆم لێی ئامادە کرد. ئەمڕۆ لە ماڵپەڕەکەمدا ئەو سکۆرەم بڵاو کردەوە.
هەر چۆنێک بێت، وا نۆ ساڵە ئەم مووسیکە هەر وا بە هەتیوی لام ماوەتەوە. حەفتەی ڕابردوو بە ڕێکەوت سەیرم کردەوە و گوێم لێی گرتەوە. بیرم کەوتەوە ئەمەشم کردووە. بۆ بڵاوی نەکەمەوە و خۆمی لێ ڕزگار بکەم؟ ڕەنگە ئەوەی زۆر بە دڵی من نییە، کەسێکی تر زۆر چێژی لێ ببینێت.
بۆیە وا ئەم دەرکردە دەنگییەی تیپەکە و نۆتەی پیانۆکە بڵاو دەکەمەوە. هیوادارم چێژی هەبێت و پێنج شەش خولەکێک لە شتی عەرەبی و فارسی و تورکی دوورتان بخاتەوە.
